Volleyball: Matheus Bettim yasubiye muri Police yitegura Shampiyona Nyafurika

Umunya-Brésil, Matheus Bettim, yasubiye muri Police VC ikomeje kwitegura Shampiyona Nyafurika y’Amakipe y’Abagabo (CAVB Men’s Club Championship) izabera i Kigali kuva ku wa 20 Mata kugeza ku wa 3 Gicurasi 2026.

Uyu mukinnyi ni umwe mu bafashije Ikipe ya Polisi y’Igihugu kwitwara neza mu mwaka ushize w’imikino, yegukana ibikombe bitandukanye nubwo icya shampiyona yakiburiye mu mikino ya nyuma yatsindiwemo na APR VC.

Uyu mukinnyi w’imyaka 24, yitezweho kongerera imbaraga Police, aho asanze abandi bakinnyi beza nka Elphas Makuto, Gideon Angiro na Brian Melly.

Iri rushanwa rihuza amakipe meza muri Afurika rigiye kuba ku nshuro ya 47, ikaba iya mbere rizaba ribereye munsi y’Ubutayu bwa Sahara.

Biteganijwe ko rizitabirwa n’amakipe 27, aho u Rwanda ruzahagararirwa na Police VC, APR VC na Kepler VC.